वोट

वोट

चुनावों कू बगत च, नेताओं की बोली लगी च

जने द्याखो उने ही, नेताओं कू येराट मचयूं च

दिखेंद नी छयाई पेल, उंक आज कौथिग लगयूं च

अकड़ सरिल अर कपड़ों की, यूं नेताओ की हरची च 

कबी सुणी नी के की, आज दरजू दरजू पौन्छ्यूं च

हरएक पारटी कू नेता बल, आज भिखमंगू बण्यू च

वायदों की लिस्ट मा, फ्री कू मसेटू खूब रलयू च

बुलण मा क्या जांदू, नारों की थकुली खूब सजयीं च

जन जन टेम अगने बढणु, रंगमत वोटर भी हूणों च

दारु पैसो क छुयाँ फुटण छन, बल मौल्यार खूब अयीं च

एक हेन्काक टंगड़ी खिंची, नातो रिश्तों मा गरमाहट दिखेणी च

भेजी भुल्ला, दीदी भुल्ली, काका काकी, ब्वाडा बौडी, खूब सुनेणु च

पर सूणा बात “प्रतिबिम्ब” की, वोट दीण कू तुम जरुर जयां

अपर हित से पेली राष्ट्रहित दिखेन, फ्री न स्वाभिमान तें जितायाँ

प्रतिबिम्ब बड़थ्वाल २/२/२२

(अपनी बोलि अर अपणी भाषा क दग्डी प्रेम करल्या त अपणी संस्कृति क दगड जुडना मा आसानी होली)

म्यार चिंतन – २०२२

म्यार चिंतन – २०२२

( ने शुरुआत - अपड़ी हिंदी रचना क रूपांतर)

लेख छयाई जू आखर, अब वू मै से दूर ह्वे गीन

उकेर छयाई जू कागज़ पर, अब वू तुम्हर ह्वे गीन

इमानदार कोशिस ह्वेली, ये बरस कुछ लेखी जोऊँ

अपणा शब्द भावों ते, सेत तुम्हर करीब ले ओंऊँ

शब्द ज्ञान सीमित च, फिर तुमसे कुछ सीख जोलू

स्नेह आसीरबाद तुम्हरू, सेत मिते मिली जालू 

लिखलू मी सच, पर कभी कडू म्यार बोल ह्वाला

'प्रतिबिम्ब' हमर ही ह्वालो, आखर केवल म्यार ह्वाला

-प्रतिबिम्ब बड़थ्वाल, २ जनवरी २०२२

(अपनी बोलि अर अपणी भाषा क दग्डी प्रेम करल्या त अपणी संस्कृति क दगड जुडना मा आसानी होली)

नौ दुर्गा

नौ दुर्गा 

माँ तेरी माया सब्यू न जाणी 

पर केन त्वेते ठीक से नी पछाणी

नौ दिने की तेरी यात्रा बताणू छौं

तेरी रूप की महिमा मी सजाणु छौं 

जे माँ जगतजननी नमोsस्तुते, 

जे माँ सर्वास्त्रधारिणी नमोsस्तुते

पेल तीन दिन तेरी पूजा हून्दी 

ऊर्जा अर शक्ति तेरी पूजे जान्द 

शैलपुत्री ब्रह्मचारिणी अर चनद्र्घंटा

यूं नाम से त्वेते पछेsणे जान्द

जे माँ भवमोचनी नमोsस्तुते

जे माँ शक्तिस्वरुपणी नमोsस्तुते 

अगला तीन दिन माँ तेरी पूजा हून्दी 

तू लक्ष्मी,समृधि, शान्ति क स्वरूप छेई  

कूष्मांडा, स्कन्दमाता अर कात्यायनी

यूं नामो से तेरी पूजा हम करदा 

जे माँ ब्रह्मवादिनी नमोsस्तुते

जे माँ पिनाकधारिणी नमोsस्तुते 

आखिर मा तीन दिन तेरी पूजा हून्दी 

रिद्धि सिद्धि की पूजा अर तेरी विदे हून्दी

कालरात्रि, महागौरी अर सिद्धिदात्री

तेरा स्वरूप का ही छन यू नाम 

जे माँ भुवनेश्वरी नमोsस्तुते 

जे माँ सत्यानन्दस्वरूपणी नमोsस्तुते 

जे माँ विमिलौत्कार्शिनी, जे माँ निशुम्भशुम्भहननी

जे माँ महिषासुरमर्दिनी, जे माँ चंडमुंडविनाशिनी

जे माँ कात्यायनी, जे माँ सर्वदानवघातिनी

तू ही छे नारायणी, तू ही सत्या

तू ही छे बलप्रदा, तू ही भाव्या

तू ही छे भवानी, तू ही देवमाता

तू ही छे प्रत्यक्षा, तू ही विष्णुमाया

जे माँ जगतजननी नमोsस्तुते, 

जे माँ सर्वास्त्रधारिणी नमोsस्तुते

जे माँ भवमोचनी नमोsस्तुते

जे माँ शक्तिस्वरुपणी नमोsस्तुते 

जे माँ ब्रह्मवादिनी नमोsस्तुते 

जे माँ पिनाकधारिणी नमोsस्तुते 

जे माँ भुवनेश्वरी नमोsस्तुते 

जे माँ सत्यानन्दस्वरूपणी नमोsस्तुते

प्रतिबिम्ब बड़थ्वाल – १४ अक्टूबर, २०२१

(अपनी बोलि अर अपणी भाषा क दग्डी प्रेम करल्या त अपणी संस्कृति क दगड जुडना मा आसानी होली)

मेर वा

रम झुम

छम छम

मेर वा

आंदी च

घम घम

चम चम

करदी च

रक रक

सक सक

 

मी बुल्दु

थम थम

ये मेरी

हंसदी बुरास

नी हेंस

मुल मुल

जिकुड़ी हिल्दी

झम झम

सुण मेरी

सुख्यूं पराण

द्वी घड़ी

माया लगोला

 

वा बुल्दी

कभी त

केरा सरम

म्यारा स्वामी

केरा करम

तुमर दगड़

फुटिन करम

तुमरी सौं

सदनी की

झक झक

करदा छौ

बक बक 

फुंड फूंका

अपरी छूईं

-    प्रतिबिम्ब बड़थ्वाल ०९\१२\२०२०

(अपनी बोलि अर अपणी भाषा क दग्डी प्रेम करल्या त अपणी संस्कृति क दगड जुडना मा आसानी होली)

लिखण कुण तैयार छौं

देबी दिबतौ की खूब पूजे करी 

डांडा काण्ठियू ते खूब ल्याख

ब्यो बरती कू खूब स्वांग रची  

खुदेड़ गीतों मा खूब रूले 

रास रस्याण की अर खाणे पीणे की

की खूब घपरौल मचे

अब मीन कुछ और लिखण

ज्यू बुलणु कुछ और लिखण कू 

पर सुचणु छौं 

क्या लेखू, क्या नी लेखू 

इने उने की कथुक लिखण

तुम्हीं बताओ दी क्या लिखण

सच लिखण कि झूठ लिखण

त्वेते लिखलू त सच ही लिखलू

अफु ते लिखुल त झूठ लिखलू 

या ही त सच्चे छ अचकाल 

सच दुसरों की ही भलु लग्दु 

अपर झूठ त सदेनी लिख्द आणू छौं 

सच दुसरों कु ही लिखे जांद

बुरे त दुसरों की ही दिखेंदी 

अर टंगड़ खिंचण मा 

हम गढ़वलियूं कु 

क्वी मुक़ाबला भी त नी च

खुद ते हम, सच्चे कु पुतला समझदौ

अंगुली उठाण मा भी त आनंद आन्दु

अफु ते वाह-वाही 

अर दुसर ते सर्मन्दगी मिलद

अर हाँ इन लिखण का बाद ही त 

जीत कू अहसास हून्द 

एवरेस्ट पर जन झण्डा फहराण सी 

अर मुखड़ी पर रंगत बकी बाते की 

चलो यू ही सब

एक बार मी लिखण कुण तैयार छौं  

- प्रतिबिम्ब बड़थ्वाल

(अपनी बोलि अर अपणी भाषा क दग्डी प्रेम करल्या त अपणी संस्कृति क दगड जुडना मा आसानी होली)