गुरुवार, 8 फ़रवरी 2024

ऐतिहासिक समान नागरिक संहिता विधेयक-2024 उत्तराखण्ड विधानसभा म पारित



ऐतिहासिक समान नागरिक संहिता विधेयक-2024 उत्तराखण्ड विधानसभा म पारित

7 फरवरी कुण उत्तराखण्ड विधानसभा म भारतीय संविधान क अनुरूप ऐतिहासिक अर महत्वपूर्ण "समान नागरिक संहिता विधेयक" पारित हूँण पर समस्त प्रदेशवासियों तै हार्दिक शुभकामना।

न्याय, सम्मान, समानता, सशक्तिकरण अर प्रत्येक महिला क अधिकार ते सुरक्षित अर गरिमा ते सुनिश्चित करण  वोल जनकल्याणकारी "समान नागरिक संहिता विधेयक" हेतु माननीय मुख्यमंत्री श्री पुष्कर सिंह धामी जी अर उत्तराखण्ड सरकार ते हार्दिक बधै।

मुख्यमंत्री धामी जी न ब्वाल कि माँ गंगा अर यमुना क उद्गम स्थल देवभूमि उत्तराखण्ड बटी निकली यूसीसी क रूप म समानता अर समरूपता कि या अविरल धारा संपूर्ण देश कू पथ प्रदर्शित करयल। यू विधेयक मातृशक्ति ते सम्मान अर वूँकि सुरक्षा क प्रति सरकारे  की प्रतिबद्धता ते भी परिलक्षित करदू।    

आदरणीय प्रधानमंत्री श्री नरेंद्र मोदी जीsन बोल छयाई कि '21वीं सदी कू तीसर दशक उत्तराखण्ड कू दशक च’ प्रधानमंत्री जी क दूरदृष्टि क अनूरुप 'एक भारत-श्रेष्ठ भारत’ अर प्रदेशवासियों की आकांक्षाओं क अनुरूप उत्तराखण्ड सरकार न चुनाव से पैली देवतुल्य जनता क दगड़ करयू वायदा ते पूर्ण कार।    

आज प्रदेश विश्व पटल पर एक नै पछाण बणाणू च। इतिहास रचण वोल उत्तराखण्ड विधायिका क सभी माननीय सदस्यों, यूसीसी  क ड्राफ्ट बणाण वोल कमेटी क सभी सदस्यगणों अर अपणू बहुमूल्य समर्थन दीण वोल देवभूमि की जनता तै बड़थ्वाल कुटुंब क तरफsन बधै अर शुभकामना।


(अपनी बोलि अर अपणी भाषा क दग्डी प्रेम करल्या त अपणी संस्कृति क दगड जुडना मा आसानी होली)

गुरुवार, 23 नवंबर 2023

इगास - उत्तराखण्ड कु लोकपर्व



इगास - 23 नवंबर, 2023 

उत्तराखण्ड म त्यौहारों कु अपर अलग महत्व च। बगवाल ( दिवली ) क ठीक ग्यारह दिन बाद इगास मनये जांद। द्वि आखर - इगास क्या च, किले मनये जांद अर कन  म मनये  जांद।

त्यौहार कै न कै मान्यता क दगड़ जुडया छन – हमर सनातन धर्म म देबी दिबताओं क दगड़, क्षेत्रिय मान्यताओं क दगड़ या क्वी व्यक्ति विशेष  क दगड़।

इन मनै जांद कि रामचन्द्र जी क अयोध्या लौटsण कि खबर हमर उत्तराखण्ड क पहाड़ों म ग्यारह दिन बाद मिली। उत्तराखण्ड क लुखों न दिया जलैsन, भैलू जलैsन अर मिठsई बटिन।  बगवाल अर इगास द्वि त्यौहार ही धूमधाम से मनये जंदिन।    

एक कथा इन भी च कि तिब्बत से लडै करण क वास्ता जब हमर क्षेत्र क सेना माधो सिंह भण्डारी क नेतृत्व म जई छे जु वापिस नि आई त लोग घबरे गिन, शोक म डूब गिन। माधो सिंह भंडारी क विरोधि लुखोंsमाधो सिंह क मरे जाणsक खबर फैला द्ययाई।  माधो सिंह  भंडारी उच्छनंदन गढ़ पहुंच गे छयाई अर र गढ़पति की बेटी उदिना ते अपड़  दगड़ लये छयाई अर श्रीनगर कु युद्ध जीतीsकन  ये दिन पर वापिस  आई छयाई।    तब समस्त क्षेत्रsक लुखोंsन दीप जलेsकन खुसी मनेई।  

एक और कथा महाभारत काल से भी जुड़ी । दंत कथाओंsक अनुसार महाभारत काल म भीम ते कै राक्षस ते  युद्धsक चेतावनी दे छेबिन्डि दिनो तक युद्ध चल अर जब भीम वापस लौटिन त पांडवोंsन दीपोत्सव मनाई।  बुले जांद कि ये अवसर ते भी इगास क रूप म ही मने जांद।

गौं क सबी मनखि दिया जलन्दिन, भैलू जलन्दिन  अर पकवान बणेन्दिन। भैलू खूब खिले जांद। भैलू जलाण  क वास्ता चीड़ क डाsल क लखड़ ( किले कि लीसू बंडी  देर तक जलदू) कु प्रयोग करदिन।  बगवाल/इगास/बूढ़ी दिवाली क दिन पूजा पाठ क बाद गौं क मनखि एकठ्ठा ह्वे कन भैलो खिलदिन। गौं क लोग करतब करदिन अर पारंपरिक लोक गीतों ( भैलो रे भैलो, काखरी को रैलू / अर उज़्यलू आलो,  अंधेरों  भागलो)  पर नचदिन। पंडों, छन्चरी झूमेलों जन नृत्य खूब नचे  जंदिन।   

आज देवोत्थान एकादशी भी हून्द। धार्मिक मान्यताओं क अनुसार सृष्टि क संचालक विष्णु जी दिबता चअर मैना क  योग निंद्रा से जगदिन अर पर पर कार्यभार ते सम्भलदिन। मिठ्ठा करेला अर लाल बासमती कू भात बणाई जांद।

आप सब्यू ते इगास अर देवोत्थान एकादशी कि हार्दिक बधै, शुभकामना छन  

(अपनी बोलि अर अपणी भाषा क दग्डी प्रेम करल्या त अपणी संस्कृति क दगड जुडना मा आसानी होली)

शनिवार, 18 नवंबर 2023

गुठयार लग्यूं च



 

खतणू च क्वी, बिराणू च क्वी

बुलणू च क्वी, सनकौणू च क्वी

बुतणू च क्वी, खाणू च क्वी

सर्याणू च क्वी, बोकणू च क्वी

 

धाद लगणि च, कुछ त बटेणु च कखि

धुवां उठणू च, कुछ त फुकेंणु च कखि

धूल उडणि च, कुछ त सोरेणु च कखि

धूपेणु यख च, दिबता नचणू च कखि

 

ठेकदार बणिक, हेंक ते सताणा छन

लिखयूं हैंका कू, जोर से बुलणा छन

ज्यूंद ते फुकणा, मुरया ते नवाणा छन

अफू छन पकौणा, हैँक ते कटणा छन

 

सब्यूं क, अपर - अपर गुठयार लग्यूं च

घचपच म, खमणाट तख खूब सुणेनि च

बिग्ड्यूं च, मरखुया बणिक सिंग्याणु च

धद्याणु च, मौका मिलद ही कच्याणु च 

 

खिगताट कना, अपरि हैन्स उड़ाणा छन

भरयूं पुटुक, रवटी हैँककि चुंगन्याणा छन

नेता बण्या, अपरु गुठयार म पौछाणा छन

मलासि कि, फुसलै कि मौ चमकाणा छन

 

प्रतिबिम्ब बड़थ्वाल

25 अक्टूबर, 2023 


(अपनी बोलि अर अपणी भाषा क दग्डी प्रेम करल्या त अपणी संस्कृति क दगड जुडना मा आसानी होली)

बुधवार, 1 नवंबर 2023

म्यार आखर - मेरा कबिता




https://www.youtube.com/watch?v=W0DsMu-_g38



(अपनी बोलि अर अपणी भाषा क दग्डी प्रेम करल्या त अपणी संस्कृति क दगड जुडना मा आसानी होली)

बुधवार, 2 फ़रवरी 2022

वोट




वोट

चुनावों कू बगत च, नेताओं की बोली लगी च
जने द्याखो उने ही, नेताओं कू येराट मचयूं च

दिखेंद नी छयाई पेल, उंक आज कौथिग लगयूं च
अकड़ सरिल अर कपड़ों की, यूं नेताओ की हरची च 

कबी सुणी नी के की, आज दरजू दरजू पौन्छ्यूं च
हरएक पारटी कू नेता बल, आज भिखमंगू बण्यू च

वायदों की लिस्ट मा, फ्री कू मसेटू खूब रलयू च
बुलण मा क्या जांदू, नारों की थकुली खूब सजयीं च

जन जन टेम अगने बढणु, रंगमत वोटर भी हूणों च
दारु पैसो क छुयाँ फुटण छन, बल मौल्यार खूब अयीं च

एक हेन्काक टंगड़ी खिंची, नातो रिश्तों मा गरमाहट दिखेणी च
भेजी भुल्ला, दीदी भुल्ली, काका काकी, ब्वाडा बौडी, खूब सुनेणु च

पर सूणा बात “प्रतिबिम्ब” की, वोट दीण कू तुम जरुर जयां
अपर हित से पेली राष्ट्रहित दिखेन, फ्री न स्वाभिमान तें जितायाँ


प्रतिबिम्ब बड़थ्वाल २/२/२२
(अपनी बोलि अर अपणी भाषा क दग्डी प्रेम करल्या त अपणी संस्कृति क दगड जुडना मा आसानी होली)