गुठयार लग्यूं च

 

खतणू च क्वी, बिराणू च क्वी

बुलणू च क्वी, सनकौणू च क्वी

बुतणू च क्वी, खाणू च क्वी

सर्याणू च क्वी, बोकणू च क्वी

 

धाद लगणि च, कुछ त बटेणु च कखि

धुवां उठणू च, कुछ त फुकेंणु च कखि

धूल उडणि च, कुछ त सोरेणु च कखि

धूपेणु यख च, दिबता नचणू च कखि

 

ठेकदार बणिक, हेंक ते सताणा छन

लिखयूं हैंका कू, जोर से बुलणा छन

ज्यूंद ते फुकणा, मुरया ते नवाणा छन

अफू छन पकौणा, हैँक ते कटणा छन

 

सब्यूं क, अपर - अपर गुठयार लग्यूं च

घचपच म, खमणाट तख खूब सुणेनि च

बिग्ड्यूं च, मरखुया बणिक सिंग्याणु च

धद्याणु च, मौका मिलद ही कच्याणु च 

 

खिगताट कना, अपरि हैन्स उड़ाणा छन

भरयूं पुटुक, रवटी हैँककि चुंगन्याणा छन

नेता बण्या, अपरु गुठयार म पौछाणा छन

मलासि कि, फुसलै कि मौ चमकाणा छन

 

प्रतिबिम्ब बड़थ्वाल

25 अक्टूबर, 2023 

(अपनी बोलि अर अपणी भाषा क दग्डी प्रेम करल्या त अपणी संस्कृति क दगड जुडना मा आसानी होली)