सुबेर साम अद्धी कच्ची पीणू रेंद
बौन्ला बिटे की मी गुराण्नू रेंद
जू नी बोल साक कबी
झांझी बणिक मी बरराणू रेंद
द्वी घूट भीतर जन्दीन त
असली मनखी फिर भेर आन्दू
क्जायान्णी ते कच्याणू रेंद
नौनियालो ते धम्काणो रेंद
गों का मनखी तब बौग मारी लिंदीन
अर मी दिन मा भी तारा गिणनू रेंद
छौं मी ठेठ पहाड़ी, पछाण ल्यावा
बिना खयां [ सिकार] पियाँ [ दारु] रौंस नी आंदी
के बिगरेल मनखी न ब्वालि हवालो कि
सूर्या अस्त त पहाड़ हवे जान्द मस्त
मी त दिन रात करदू खान्णी पीन्णी,
पेली मस्त फिर से जान्दू फिर मी ह्वेकन
पस्त
- प्रतिबिम्ब बड़थ्वाल
(अपनी बोलि अर अपणी भाषा क दग्डी प्रेम करल्या त अपणी संस्कृति क दगड जुडना मा आसानी होली)
कोई टिप्पणी नहीं:
एक टिप्पणी भेजें