हिंदी कू अरसा मतलब हूंद टेम च
गढ़वली अरसा मतलब हूंद क्ल्यो च
देवभूमि क यू एक प्रसिद मिस्ठान च
ब्यो बरतियू मा यू हमरू सम्मान च
उन बुल्दिन अरसा कर्नाटक बटी अयूँ च
छ्याई अरसालु हमर इख अरसा बण्यू च
उत्तराखंड मा बरस्यू बटी खूब छयूँ च
देवभूमि मा अरसा शंकरचार्य क ल्यूँ च
याद कराणू छौ तुम भी अरसा बणे ल्यावा
चोलों ते राती कुण भीगे की धेरी द्यावा
उरख्याली मा कूटो या तुम पीसी ल्यावा
गुड़ चूरी क या ताक बणे सौंफ मिले ल्यावा
ज़रा पाणी, घ्यू मिले की लोई बणे द्यावा
तिल डाली की अरसों ते न्ये रूप द्यावा
सरोंसू तेल मा तली की अरसा बणे ल्यावा
गरम खावा चाहे मेना भर कू धेरी द्यावा
देवभूमि का खाणों मा मिलदी च खूब रस्याण
अरसों क क्या बुलण अर तुमते अब क्या सुणान
रिंगाsले क बणी हथकंडी च सुबकामो क पछाण
मालू अर तिमला क पतो मा अरसों कू सम्मूण
मीठे दुनिया भरे की पर अरसा कू स्वाद बेजोड़
भे बंदो कू परेम अर सुसरास मा नी यांक तोड़
स्वालों पकोड़ो दगड़ी अरसा बणी हमरी पेछाण
नी बिसरी जेन हमरी संस्कृति अर हमरी पछाण
प्रतिबिम्ब बड़थ्वाल, ०५/११/२०२०
कोई टिप्पणी नहीं:
एक टिप्पणी भेजें